Abstract

• ဤစာတမ်းတွင် အနက်ငုပ် လုံးတွဲကြိယာအချို့၏အကြောင်းကို ရှေးစာပေများ၊ အနက်ဖွင့်ကျမ်းများ၊ အဘိဓာန်များကို အခြေပြု၍ လေ့လာထားပါသည်။ မြန်မာစာပေ အဦးအစဖြစ်သော ပုဂံခေတ်အခါက မြန်မာဘာသာစကားတွင် လုံးချင်းကြိယာများကို အသုံးများသော်လည်း နောက်ပိုင်းခေတ်များတွင် လုံးတွဲ ကြိယာများကို တွင်တွင်ကျယ်ကျယ် အသုံးပြုလာကြသည်။ ထိုလုံးတွဲကြိယာ တို့တွင် အချို့သည် ရှေ့ကြိယာတို့၏ အနက်မှာ ထင်ရှားသော်လည်း နောက်ကြိယာ၏အနက်မှာ ကွယ်လျက်ရှိသည်။ အချို့မှာမူ ကြိယာတစ်လုံးစီ ခွဲထုတ်လိုက်လျှင် အနက်ပြောင်းသွားပြန်သည်။ ယခင်က ကြိယာအဖြစ် အသုံးပြုခဲ့သည့် စကားတို့သည် နောက်ဆက်များ၊ ပစ္စည်းများအဖြစ် အသုံးရွေ့ သွားသည်ကိုလည်း တွေ့ရပါသည်။ ထိုလုံးတွဲကြိယာများကို အနက်ကြံဆ ကြည့်ခြင်းအားဖြင့် မြန်မာဘာသာစကားမှ အနက်ငုပ်ကြိယာတို့အကြောင်းကို လေ့လာဖော်ထုတ်နိုင်ရန် ရည်ရွယ်ပါသည်။